Latin

Ἑλληνική Transliterate

XIII . Quod nihil minus sit tolerandum in rerum ordine quam ut creatura creatori debitum honorem auferat et non solvat quod aufert
A . : Nihil minus tolerandum in rerum ordine , quam ut creatura creatori debitum honorem auferat et non solvat quod aufert .
B . : Hoc nihil clarius .
A . : Nihil autem iniustius tolerator , quam quo nihil est minus tolerandum .
B . : Nec hoc est obscurum .
A . : Puto ergo quia non dices Deum debere tolerare quo nihil toleratur iniustius , ut creatura non reddat Deo quod aufert .
B . : Immo penitus negandum esse video .
A . : Item . Si Deo nihil maius aut melius , nihil iustius quam honorem illius servat in rerum dispositione summa iustitia , quae non est aliud quam ipse Deus .
B . : Hoc quoque nil apertius .
A . : Nihil ergo servat Deus iustius quam suae dignitatis honorem .
B . : Concedere me oportet .
A . : Videtur tibi quod eum integre servet , si sic auferri sibi permittit , ut nec solvatur nec ipse auferentem puniat ?
B . : Non audeo dicere .
A . : Necesse est ergo , ut aut ablatus honor solvatur aut poena sequitur . Alioquin aut sibi Deus ipsi iustus non erit aut ad utrumque impotens erit ; quod nefas est vel cogitare .